mercoledì 11 maggio 2011

'MMIEZ' Ô GGRANO (Nicolardi – Nardella)


E 'a sera, sott''o pásteno
d''e mméle annurche, passa
stu core sempe gióvane
ca ride e ch'arrepassa...
E 'a luna, pazziánnose
nu ramo e n'atu ramo,
'nterra, cu 'e file d'èvera,
ricama nu ricamo...

Oje Stella, Sté'...ch'aspiette nu signale,
'o ggrano ammaturato è culor d'oro:
E sti capille tuoje só' tale e quale...
E 'o ssaje ca i' mme ne moro,
si 'mmiez'ô ggrano, nun mm''e ffaje vasá!...

Quanno 'e marite dòrmono,
stracque 'e fatica ancora,
ll'ammore, che sta pésole,
sceglie 'a quartata 'e ll'ora...
St'arille comme cantano
sott'a 'sta luna chiara!
E comm'addora 'o ccánapa
pe' tuorno a 'sta pagliara...

 Ma tu nun duorme: è inutile...
stu core tujo mme sente
quanno, pe' sott'a ll'albere,
passo annascostamente...
E ghiésce fore pallida,
bella comm'a nisciuna...
E 'a luna, zenniánnoce,
cufféa...'sta 'mpésa 'e luna!...